گڈانی شپ بریکنگ یارڈ میںآتشزدگی 7مزدور جھلس گئے

  • October 15, 2018, 12:08 am
  • National News
  • 102 Views

کوئٹہ(ویب ڈیسک)گڈانی شپ بریکنگ یارڈ میں شپ میں آگ لگنے سے 7 مزدور جھلس گئے۔ جھلسنے والے 2مزدوروں کی حالت تشویش ناک بتائی جاتی ہے۔آتشزدگی کا واقعہ گڈانی شپ بریکنگ یارڈ میں پلاٹ نمبر 10 میں پیش آیا۔ جھلسنے والے مزدوروں کو ایدھی ایمبولنس کے ذریعے کراچی منتقل کیا جا رہا ہے۔شپ بریکنگ یارڈ کے وائس چئیرمین غنی سیٹھ نے بتایا کہ آگ پلاٹ نمبر دس میں لگی ہے جس پر اب تک قابو نہیں پایا جا سکا اور اب تک فائر بریگیڈ کی گاڑیاں بھی نہیں پہنچی۔انھوں نے مزید کہا اس صنعت میں حفاظتی اقدامات کیے جانے کے باوجود ایسے واقعات پیش آتے ہیں۔دوسری جانب جائے وقوعہ پر شپ بریکنگ ایسوسی ایشن کا کوئی نمائندہ موجود نہیں۔ شپ بریکنگ ورکرز یونین کے صدر بشیر محمودانی نے بتایا کہ شپ بریکرز کی روایتی جلد بازی سے مزدوروں کی جان خطرے میں ڈالی جاتی ہے جو ایک مہینے کا کام ایک ہفتے میں ختم کرنا چاہتے ہیں جب کہ شپ بریکرز اربوں روپے کمانے کے باوجود یہاں آگ بجھانے کے لیے فائر بریگیڈ کا انتظام نہیں کر پائے اور نہ ہی مزدوروں کے لیے کوئی حفاظتی انتظامات کیے جاتے ہیں۔واضح رہے کہ نومبر 2016 میں ایسے ہی تیل بردار جہاز کی صفائی کے دوران آگ لگنے سے دو درجن سے زائد ہلاکتیں اور 70 سے زائد مزدور زخمی ہوئے تھے جس کے بعد شپ بریکنگ یارڈ میں تیل بردار جہازوں کی صفائی پر پابندی لگائی گئی تھی ۔

Featured News