16لاکھ 78ہزارسے زائد بچوں کو پولیو سے بچاؤ کے قطرے پلائے جائیں گے

16لاکھ 78ہزارسے زائد بچوں کو پولیو سے بچاؤ کے قطرے پلائے جائیں گے

• October 24, 2016, 11:46 am
• National News
• 60 Views

کوئٹہ(اسٹاف رپورٹر)ایمرجنسی آپریشن سینٹر بلوچستان کے کوآرڈینیٹر سید فیصل احمدنے کہاہے کہ ہم پولیو کیخلاف مہم میں سنجیدہ ہیں اورانسداد پولیو مہم کے سلسلے میں پولیو ورکرز اور رضاکاروں سمیت معاشرے کے تمام طبقوں کی مشترکہ کوششوں سے ہمیں بلوچستا ن میں خاطر خواہ کامیابی ملی ہے بلوچستان کے 13اضلاع میں تین روزہ پولیو مہم 24اکتوبر سے شروع ہوگی جس کے لئے تمام تیاریاں مکمل کرلی گئی ہیں تین روزہ مہم کے دوران 5سال کی عمر کے 16لاکھ 78ہزار857بچوں کو پولیو سے بچاؤ کے قطرے پلائے جائیں گے،مہم کے لئے6040ٹیمیں تشکیل دی گئی ہیں جن میں 378موبائل،415فکسڈسائٹ اور247ٹرانزٹ پوائنٹس بنائےگئےہیں،مہم کی سیکورٹی کےلئےسخت انتظامات کئے گئے ہیں، پولیس، لیویز اور فرنٹیئر کور کے جوان عملے کی سیکورٹی کے فرائض انجام دیں گے، مہم کو کامیاب بنانے اورہربچے کو پولیو سے بچاؤ کے قطرے پلانے کیلئے کمیونٹی ہیلتھ رضاکاروں کی بھی خدمات لی جارہی ہیں،جو ہائی رسک علاقوں میں کام کریں گے،انہوں نے کہا کہ پولیو مہم کوبہتر بنانے کیلئے علماء ،قبائلی رہنماؤں اورمعتبرین کی بھی مددلی جارہی ہے،انہوں نے کہا کہ قلعہ سیف اللہ ،قلعہ عبداللہ،نصیر آباد،جعفرآباد،پشین،لورالائی،ڈیرہ بگٹی،لسبیلہ ،شیرانی، کوئٹہ،ژوب،جھل مگسی اور خضدار میں پولیو مہم چلائی جائے گی،انہوں نے کہا کہ 24اکتوبرکو پولیو کا عالمی دن بھی منایا جارہا ہے،ہم اس عزم کا اظہار کرتے ہیں کہ بلوچستا ن کو پولیو سے مکمل پاک کرکے دم لیں گے،انہوں نے کہا کہ بلوچستان اس سے قبل ملک میں پولیو کے حوالے سے انتہائی حساس جانا جاتا تھا گزشتہ سال صوبے میں پولیو کے سات کیسز رپورٹ ہوئے اس سال ہماری بھر پور کوششوں سے پولیو ختم ہونے کے قریب ہے اور پورے صوبے میں صرف ایک کیس رپورٹ ہوا ہےلیکن خطرناک بات یہ ہے کہ کوئٹہ ، پشین اور قلعہ عبداللہ سے لیے گئے گندے پانی کے نمونوں میں پولیو وائرس کی موجودگی کی تصدیق ہو گئی ہے جس کا مطلب یہ ہے کہ ہمارے بچوںکا پولیو سے معذور ہونے کا خدشہ موجود ہےحالیہ مہم اس حوالے سے انتہائی اہم ہے،والدین کو چاہیے کہ وہ کسی صورت اپنے بچے کوپو لیو سے بچاؤ کے قطرے پلانے سے محروم نہ رکھیں، ذرا سی لاپرواہی سے عمر بھر کی معذوری بچے کا مقدر بن سکتاہے،ہم یہاں انسداد پولیو کے حوالے سے اپنے عزم کو دہراتے ہوئے تمام والدین سے اپیل کرتے ہیں کہ وہ اپنے بچوں کو پولیو کے مرض سے بچانے کیلئے بچاؤ کے قطرے پلا کر اس مہم میں ہمارا ساتھ دیں انہوںنے کہا کہ انسداد پولیو مہم کے سلسلے میں ہمیں عالمی ادارہ صحت اور یونیسیف کا تعاون ہمیشہ سے حاصل رہا ہے اور یہ تعاون مستقبل میں جاری رہیگا۔