محدثین میں امام بخاری کا مقام بلندہے،حاجی محمد شاہد عطاری

محدثین میں امام بخاری کا مقام بلندہے،حاجی محمد شاہد عطاری

• June 29, 2018, 10:46 pm
• National News
• 46 Views

کوئٹہ(پ ر) دعوت اسلامی کی مرکزی مجلس شوریٰ کے رکن و نگران پاکستان انتظامی کابینہ حاجی محمد شاہد عطاری نے کہا ہے کہ محدثین کرام رحمتہ اللہ تعالیٰ علیھم اجمعین وہ مقدس ہستیاں ہیں جن کی شان عظمت اور مقام و مرتبہ بہت ہی بلند وبالا ہے ان حضرات نے عشق رسول کے جذبے سے سرشار ہوکر اپنی ساری زندگی حدیث پاک کی ترویج واشاعت میں گزاردی ان بزرگ ہستیوں میں جو مقام و مرتبہ امام بخاری رحمۃاللہ تعالی علیہ کو نصیب ہوا وہ اپنی مثال آپ ہے۔ان خیالات کا اظہار انہوں نے اپنے ایک بیان میں کیا۔ انہوں نے کہا کہ حضرت سیدنا امام بخاری رحمتہ اللہ تعالیٰ علیہ کی ولادت مشہور شہر بخارا میں 13شوال 194ہجری بروز جمعہ بعد نماز عصر ہوئی، امام بخاری رحمتہ اللہ تعالیٰ علیہ کا نام محمد اور کنیت ابو عبد اللہ ہے،امیر المومنین فی الحدیث ،حافظ الحدیث ،محدث ،مفتی حبیر الاسلام وغیرہ آپ کے مشہور القابات ہیں ،آپ کے اساتذہ کرام کی تعداد ایک ہزار اسی ہے اورجب آپ نے انتقال فرمایا تو نوے ہزار شاگرد محدث چھوڑے۔امام بخاری نے تقریباً 62سال کی عمر پائی یکم شوال 256ہجری بروز ہفتہ عید الفطر کی رات بیماری کی حالت میں وصال ظاہری فرمایا ،سمر قند سے کچھ فاصلے پر آپ کو سپرد خاک کیا گیا اور ادھر ہی آپ کا عالیشان مزار بھی ہے۔حاجی محمد شاہد عطاری نے کہا کہ اگر ہم محدثین کرام کی سیرت مبارکہ کا جائزہ لیں تو ان کی پاکیزہ سیرت میں ہمیں معلوم ہوگا کہ ان حضرات نے علم حدیث کے حصول اور احادیث رسول کی ترویج واشاعت کی خاطر اپنا سب کچھ قربان کردیا ، حتیٰ کہ اس راہ میں اپنے گھر بار کو خیر آباد کہہ کر دور دراز ملکوں اور شہر کا سفر طے کرکے علم حدیث حاصل کیا،الحمد للہ عزوجل امام بخاری رحمتہ اللہ تعالیٰ علیہ چونکہ یادگار اسلاف تھے ،لہٰذا آپ نے محدثین کرام رحمتہ اللہ تعالیٰ علیہم اجمعین کے نقش قدم پر چلتے ہوئے اس مقصد کی خاطر اپنے آبائی وطن کو چھوڑ ا دور دراز شہروں کا سفر اختیار فرمایا اور انتہائی کم عمری میں ہی میدان حدیث میں اپنی صلاحیتوں کا لوہا منوایا۔