پورے ملک میں پانی کا بحران سنجیدہ شکل اختیار کرتاجارہا ہے ،گورنر اچکزئی

پورے ملک میں پانی کا بحران سنجیدہ شکل اختیار کرتاجارہا ہے ،گورنر اچکزئی

• July 9, 2018, 10:54 pm
• National News
• 43 Views

کوئٹہ(خ ن ) گورنر بلوچستان محمد خان اچکزئی نے کہا ہے کہ پورے ملک میں پانی کا بحران سنجیدہ شکل اختیار کرتاجارہا ہے اور خاص طور سے بلوچستان کوقلت آب کی سنگین صورتحال کا سامنا ہے ۔ انہوں نے کہا کہ صوبے اور ملک میں پانی کے مسئلے کو حل کرنے کیلئے جامعہ منصوبہ بندی اور مشترکہ اقدامات کی اشد ضرورت ہے یہ بات انہوں نے سندھ کے قائمقام گورنرآغا سراج درانی سے ٹیلی فون پر گفتگو کے دوران کہی ۔ گورنرنے بلوچستان صوبے میں طویل خشک سالی ، بارشوں کے نہ ہونے اور زیر زمین پانی کی سطح مسلسل گرنے کے باعث پیداہو نے والی خطرناک صورتحال سے قائمقام گورنر سندھ کو آگا ہ کیا ۔ اور کہا کہ ماہرین کے مطابق اگر مؤثر اقدامات نہ کئے گئے تو صوبائی دار الحکومت کوئٹہ آنے والے چندسالوں میں ویرانے میں تبدیل ہوجائیگا ۔ اس موقع پر قائمقام گورنر سندھ نے بھی قلت آب کے باعث سندھ کی زراعت کو پہنچے والے بے پناہ نقصانات کا ذکر کیا۔ انہوں نے گورنر بلوچستان سے اتفاق کیا کہ پانی کا مسئلہ بیک وقت تمام صوبوں کو درپیش ہے اور اس مسئلے کے حل کیلئے قومی سطح پر منصوبہ بندی اور مشترکہ حکمت عملی طے کرنا وقت کا اہم تقاضہ ہے ۔